- რამდენ ხანს გრძელდება გათეთრების პროცედურა სტომატოლოგთან?
Zoom-ით კბილების გათეთრება ტექნიკურად მარტივი პროცედურაა და 45-60 წუთი გრძელდება. მაგრამ მანამდე სტომატოლოგი ატარებს გაწმენდას და პოლირებას, ნადებისა და ლაქების მოსაშორებლად. მხოლოდ ამის შემდეგ ხდება გამათეთრებელი გელის აპლიკაცია კბილებზე და დაშუქება სპეციალური ლამპით, რაც 3-4 ჯერ მეორდება იმის მიხედვით, თუ რამდენი ტონით გვსურს გათეთრება. თითოეული აპლიკაცია 15 წუთი გრძელდება. - რამდენად უსაფრთხოა ეს პროცესი?
არაპროფესიონალური, სახლის პირობებში გამოსაყენებელი სისტემებისგან განსხვავებით Zoom-ით კბილების გათეთრება უსაფრთხო კოსმეტიკური სტომატოლოგიური პროცედურაა, თუკი გამოიყენება ორიგინალური აპარატი და მწარმოებლის მიერ მოწოდებული მასალა. - რამდენად მტკივნეულია პროცედურა?
ზოგიერთი პაციენტი აღნიშნავს კბილების მგრძნობელობის მომატებას და დისკომფორტს, ზოგი მსუბუქი ტკივილის შეგრძნებას. ეს შეგრძნებები დამოკიდებულია ტკივილის ინდივიდუალურ ზღვარზე და ორგანიზმის ტოლერანტობაზე ტკივილის მიმართ. საჭიროების მიხედვით შესაძლებელია როგორც ადგილობრივი ანესთეზიის, ისე ტკივილგამაყუჩებელი პრეპარატების ან მგრძნობელობის საწინააღმდეგო კბილის პასტის გამოყენება კბილების გათეთრების შემდეგ. - რამდენ ხანს გრძელდება ეფექტი?
ეს დამოკიდებულია თქვენი ცხოვრების წესზე, დიეტაზე და კვების თავისებურებაზე. Zoom-ის ეფექტის შენარჩუნება შესაძლებელია 1-2 წლის განმავლობაში, მაგრამ პიგმენტების შემცველი საკვებისა და სასმელის ხშირი გამოყენება ამ ვადას შეამცირებს. შესაბამისად, ამ პროცესის კონტროლის ბერკეტი თქვენს ხელშია. - ყველამ შეიძლება თუ არა ჩაიტაროს კბილების გათეთრების პროცედურა?
პრაქტიკულად ყველამ. უკუჩვენებას წარმოადგენს ალერგიული რეაქცია გამათეთრებელი გელის კომპონენტენზე (პეროქსიდი). ორსულობის ან ლაქტაციის პერიოდში რეკომენდებულია პროცედურის გადავადება, ხოლო კბილების მომატებული მგრძნობელობის შემთხვევაში უმჯობესია ჯერ ჩატარდეს მინანქრის რემინერალიზაციის კურსი.
ყველაფერი სტომატოლოგიაზე 
გამარჯობა. მინდა კბილების გათეთრება კაპებით, მაქვს ეშვი და მისი მომდევნო კბილი მკვდარი ანუ 4 და მე-5. როგორც წავიკითხე მკვდარი კბილი მხოლოდ ენდოგათეთრებით თეთრდება რისიც მეშინია. იქნებ არის შანსი პრაქტიკაში ყოფილა რომ კაპებით გათეთრებისას მკვდარი კბილიც გათეთრებულიყოს, თუნდაც ისე რომ ჩამორჩეს ოდნავ სხვა კბილებს. თან ეშვი მგონი ყველას ყვითელი აქვს და არაუშავს. ჩემი ეშვი სხვა კბილებთან შედარებით ყვითელია, გაშავებული არაა და იქნებ მოვკლა ეს სიყვითლე, არ მინდა ვინირი. მაქსიმალურად მინდა შევინარჩუნო საკუთარი კბილები. მადლობა
თუ კაპებით გათეთრებას მაინც იტარებთ სხვა კბილებისთვის, გამოჩნდება რამდენად დაექვემდებარება ეშვი ამ მეთოდს. მაგრამ გამომდინარე იქიდან, რომ მკვდარი კბილის პრობლემა შედა ქსოვილის ანუ დენტინის გამუქებაა და არა მინანქრის, კაპებით ანუ გარედან გათეთრება ნაკლებად ეფექტურია და მხოლოდ მინანქრის გაღიავებით მიღებულ შედეგს დაინახავთ. თუ არ დაგაკმაყოფილებთ, მაშინ ან ენდოგათეთრება უნდა გაიკეთოთ, ან ვინირი.